- Auglýsing -
- Arnór Atlason og liðsmenn hans í TTH Holstebro unnu KIF Kolding, 34:31, í upphafsleik 9. umferðar dönsku úrvalsdeildarinnar í Kolding í gær. Holstebro er þar með komið upp í 5. sæti en mjótt er á munum á sex efstu liðum deildarinnar. Jón Ísak Halldórsson var öðru sinni í leikmannahópi TTH Holstebro á tímabilinu. Hann skoraði ekki mark í leiknum.
- Bergischer HC, sem Arnór Þór Gunnarsson þjálfar og Tjörvi Týr Gíslason leikur með, tapaði á útivelli fyrir TV Großwallstadt, 29:28, á heimavelli síðarnefnda liðsins í gær en leikurinn var liður í 2. deild þýska handknattleiksins. Þetta var annað tap Bergischer HC í níu leikjum í deildinni fram til þessa. Liðið er engu að síður áfram í efsta sæti, stigi fyrir ofan Ludwigshafen.
- Tjörvi Týr skoraði ekki mark fyrir Bergischer HC í leiknum í gær. Honum var tvisvar vikið af leikvelli í tvær mínútur í hvort skiptið.
- Daníel Þór Ingason skoraði tvö mörk fyrir HBW Balingen-Weilstetten í jafntefli við HSG Nordhorn-Lingen, 27:27, þýsku 2. deildinni en leikið var í Sparkassen-Arena í Balingen. Með Nordhorn leikur Elmar Erlingsson, bróðir Söndru, sambýliskonu Daníels Þórs. Elmar skoraði ekki mark í leiknum í Balingen. Ef mark er takandi á tölfræði á heimasíðu þýsku deildarkeppninnar þá átti Elmar eitt marskot sem geigaði.
- Balingen er í þriðja sæti 2. deildar með 11 stig og leik inni á Bergischer HC og Ludwigshafen. Nordhorn er áfram í barningi í neðri hlutanum, situr í 16. sæti af 18 liðum.
- Stöðuna í þýsku 2. deildinni og í fleiri deildum evrópsks handknattleiks er að finna hér.
- Dagur Gautason skoraði þrjú mörk, þar af eitt úr vítakasti, í þriggja marka tapi ØIF Arendal í heimsókn til Fjellhammer, 38:35, í norsku úrvalsdeildinni í handknattleik í gær. Fremur illa hefur gengið hjá ØIF Arendal og situr liðið í 11. sæti af 14 með fimm stig eftir átta leiki.
- Sigurjón Guðmundsson og félagar í Charlottenlund töpuðu fyrir Melhus í næst efstu deild norska handknattleiksins í gærkvöld, 34:27. Sigurjón stóð í markinu annan hálfleikinn og varði sjö skot, 32%. Charlottenlund er í sjötta sæti með átta stig eftir sex leiki, fjórum stigum á eftir Viking TIF og Sandefjord.
- Auglýsing -
