Elvar Örn Jónsson landsliðsmaður í handknattleik og leikmaður MT Melsungen staðfestir í samtali við Morgunblaðið sem kom út í morgun að viðræður hafi staðið yfir og eða standi yfir um að hann gangi til liðs við meistaraliðið Magdeburg í sumar.
Elvar Örn hefur verið orðaður við Magdeburg síðan snemma árs en handbolti.is hefur ekki áður séð staðfestingu um þessi hugsanlega vistaskipti.
Sjá einnig: Fullyrt að Elvar Örn fari til Evrópumeistaranna
„Það er ekki frágengið, en það eru einhverjar viðræður í gangi. Það er ekkert staðfest í þeim efnum. Það er mikill heiður að vera orðaður við félag eins og Magdeburg. Þetta er eitt besta lið heims í dag og það er gaman að vera orðaður við svo sterkt lið,“ segir Elvar Örn Jónsson orðrétt í samtali við Morgunblaðið.
Elvar Örn, Arnar Freyr Arnarsson og liðsfélagar í MT Melsungen mæta Val í fjórðu umferð riðlakeppni Evrópudeildarinnar í N1-höllinni á Hlíðarenda í kvöld. Flautað verður til leiks klukkan 19.30.
Miðasala er stubb.is.
Sjá einnig: Áfram er því haldið fram að Elvar Örn fari til meistaranna
