- Auglýsing -
- Jesper Jensen landsliðsþjálfari Dana í handknattleik kvenna tilkynnti í dag um val á þeim 16 leikmönum sem hann ætlar að tefla fram á Evrópumótinu sem hefst síðar í þessum mánuði.
- Flestum að óvörum var Sandra Toft markvörður Evrópumeistara Györi ekki valin í hópinn. Hin 35 ára gamla Toft hefur tekið þátt í öllum stórmótum danska landsliðsins frá 2013 og hefur þótt ein sú allra besta í sinni stöðu í Evrópu.
- Í stað Toft ákvað Jensen að velja Anna Kristensen markvörð Esbjerg auk Althea Reinhardt sem verið hefur markvörður danska landsliðsins síðustu árin ásamt Toft. Að öðru leyti kom val Jensens ekki á óvart, að sögn danskra fjölmiðla en hópinn er að finna hér. Jensen segist hafa staðið frammi fyrir því að velja á milli þriggja frábærra markvarða sem eru álíka að getu.
- Tékkneski landsliðsmarkvörðurinn Tomas Mrkva kveður THW Kiel næst sumar og gengur til liðs við SC DHfK Leipzig sem Rúnar Sigtryggsson þjálfar og Andri Már Rúnarsson og Viggó Kristjánsson leika með. Mrkva hefur skrifað undir tveggja ára samning. Hann kemur í stað norska landsliðsmarkvarðarins, Kristian Saeverås, sem er á sínu fimmta tímabili hjá Leipzig.
- Philipp Weber leikmaður þýska meistaraliðsins SC Magdeburg verður frá keppni í nokkrar vikur vegna meðsla sem hann varð fyrir í viðureign liðsins við Lemgo í þýsku 1. deildinni á sunnudaginn. Þetta er talsvert áfall fyrir Magdeburg vegna þess að Weber hefur leikið afar vel fyrir liðið síðustu vikur auk þess sem fleiri leikmenn eru á sjúkralista.
- Brian Ankersen sem þjálfað hefur sænska úrvalsdeildarliðið Amo HK, sem Arnar Birkir Hálfdánsson leikur með, var sagt upp störfum í dag. Ankersen tók við þjálfun liðsins í byrjun desember á síðasta ári þegar Andreas Stockenberg varð að taka pokann sinn.
- Magnus Saugstrup leikmaður SC Magdeburg hefur tekið við stöðu fyrirliða hjá danska landsliðinu eftir að markvörðurinn Niklas Landin hætti að gefa kost á sér í landsliðið. Landin var fyrirliði danska landsliðsins á síðustu árum. Danir hafa orðið heimsmeistarar þrisvar í röð og mætir sem Ólympíumeistari til leiks á HM í janúar sem fer að hluta til fram í Danmörku.
- Auglýsing -
