- Auglýsing -
- Sænski handknattleikmaðurinn Karl Wallinius hefur gengið til liðs við danska úrvalsdeildarliðið Ribe-Esbjerg eftir tveggja ára veru hjá THW Kiel í Þýskalandi. Ribe-Esbjerg er í slæmri stöðu í næst neðsta sæti dönsku úrvalsdeildarinnar og veitir ekki af liðsauka ef ekki á illa að fara.
- Wallinius er 25 ára gamall og er rétthent skytta. Hann þó með klásúlu í samningi sínum við Ribe-Esbjerg um að geta snúið aftur til Þýskalands næsta sumar ef stjórnendur Kiel sjá ástæðu til þess. Annars er samningur Svíans við Ribe-Esbjerg til ársins 2027.
- Elvar Ásgeirsson og Ágúst Elí Björgvinsson eru á meðal leikmanna Ribe-Esbjerg.
- Króatíski hornamaðurinn Manuel Štrlek er sagður á leið til þýska liðið Füchse Berlin. Hann á að hlaupa í skarðið fyrir Jerry Tollbring sem sleit krossband á dögunum og verður frá keppni næsta ári. Štrlek hefur síðasta árið leikið með RK Nexe í Króatíu.
- Handknattleiksþjálfarinn Velimir Petkovic hefur samið við Króatíumeistara RK Zagreb til ársins 2026. Ómögulegt er að spá um hversu lengi Petkovic verður við stjórnvölin ef marka má söguna því 12 menn hafa verið í þjálfarastól félagsins á 10 árum. Þar með er ekki öll sagan sögð í þeim efnum vegna þess að einn þeirra hefur komið og farið þrisvar á þessum 10 árum og annar komið og farið tvisvar.
- Franski landsliðsmaðurinn Elohim Prandi fór af leikvelli meiddur á olnboga í viðureign Frakklands og Svíþjóðar í Evrópubikarkeppni landsliða í Frakklandi í gærkvöld. Óttast er að meiðsli hans séu alvarleg sem væri afar slæm tíðindi fyrir franska og landsliðið og meistaraliðið PSG. Prandi hefur átt frábært keppnistímabil.
- Killian Villeminot leikmaður franska landsliðið fór einnig meiddur af leikvelli í viðureigninni við Svía. Hugsanlegt er talið að hann hafi slitið hásin. Frakkar unnu Svía, 37:31.
- Í hinnu viðureign Evrópubikarkeppni karlalandsliða unnu heims- og Ólympíumeistarar Danmerkur norska landsliðið, 32:27, í Jyske Bank Boxen í Herning. Mathias Gidsel skoraði 10 mörk fyrir Dani. Kent Robin Tønnesen var markahæstur hjá norska landsliðinu með fimm mörk.
- Landsliðin fjögur sem ekki taka þátt í undankeppni EM 2026 leika saman í Evrópubikarkeppni landsliða meðan önnur landslið berjast um farseðlana í lokakeppnina.
- Auglýsing -
