- Auglýsing -
- Áfram lengist meiðslalistinn hjá þýska liðinu Gummersbach. Franski miðjumaðurinn Kentin Mahé leikur ekki með liðinu næstu vikur vegna meiðsla og verður þar af leiðandi m.a. ekki með gegn FH ytra í næstu viku í Evrópudeildinni í handknattleik. Julian Köster, Teitur Örn Einarsson, Tom Kiesler og Elliði Snær Viðarsson eru þegar fyrir á meiðslalista liðs félagsins sem Guðjón Valur Sigurðsson þjálfar af myndugleika enda er það þrátt fyrir hvert áfallið á fætur öðru í hópi efst liða þýsku 1. deildarinnar í handknattleik.
- Bæjaryfirvöld í Eisenach samþykktu á dögunum að ráðast í byggingu fjölnota íþróttahallar sem m.a. nýtist handboltaliðinu sem leikur í efstu deild þýska handknattleiksins. Áætlaður kostnaður er rúmir átta milljarðar króna. Til stendur að framkvæmdir hefjist á síðari hluta næsta árs.
- Samir Bellahcene, sem varið hefur mark THW Kiel, undanfarið rúmt ár hefur verið seldur til Stuttgart í þýsku 1. deildinni. Stuttgart veitir ekki af liðsauka og tækifærum Bellahcene hefur fækkað verulega eftir komu þýska landsliðsmarkvarðarins Andreas Wolff til félagsins í sumar.
- Jens Bürkle hefur tekið við þjálfun Stuttgart af Michael Schweikardt sem leystur var frá störfum fyrir nokkrum dögum. Ásamt Bürkle kemur Jürgen Schweikardt að þjálfun liðsins. Hann er bróðir fyrrverandi þjálfara og einnig íþróttastjóri félagsins. Bürkle á hinn bóginn þjálfaði síðast Balingen–Weilstetten en hætti í voru eftir sjö ára starf.
- Króatíski handknattleiksmaðurinn Josip Šarac gengur til liðs við Tatabánya í Ungverjalandi. Frá þessu var greint í gær. Šarac er núna á sínu fjórða keppnistímabili hjá Göppingen í Þýskalandi.
- Brasilíski handknattleiksmaðurinn Rogerio Moraes hefur samið við Montpellier í Frakklandi frá og með næsta keppnistímabili en Morares leikur nú með MT Melsungen. Honum er ætlað að fylla að einhverju leyti upp í skörðin sem Veron Nacinovic og Karl Konan skilja eftir sig þegar þeir kveðja Montpellier næsta sumar. Konan er á leið til PSG eins og handbolti.is hefur áður sagt frá. Nacinovic fer til Þýskalands og leikur með THW Kiel.
- Auglýsing -
