- Auglýsing -
- Sigurjón Guðmundsson varði þrjú skot, 33%, á þeim skamma tíma sem hann fékk í marki Charlottenlund þegar liðið vann Falk Horten, 29:26, á útivelli í næst efstu deild norska handknattleiksins á sunnudaginn. Charlottenlund er í fimmta sæti deildarinnar með 12 stig að loknum níu leikjum. Sandefjord er í efsta sæti með 16 stig eftir 10 leiki.
- Tveir íslenskir eftirlitsmenn verða að störfum á leikjum lokaumferðar Evrópdeildar karla í handknattleik í kvöld. Hlynur Leifsson verður eftirlitsmaður á viðureign SG Flensburg-Handewitt og HCB Karvina í G-riðli. Leikurinn fer fram í Flensburg.
- Kristján Halldórsson heldur uppi eftirliti með leik THW Kiel og Vojvodina frá Novi Sad í Serbíu í E-riðli. Leikið verður í þýsku hafnarborginni.
- Danski handknattleiksmaðurinn Aaron Mensing leikur ekki með MT Melsungen í síðasta leik liðsins í riðlakeppni Evrópudeildarinnar í kvöld. Reyndar verður hann frá keppni í nokkrar vikur vegna meiðsla sem hann varð fyrir í viðureign Melsungen og Eisenach á föstudagskvöld. Meiðsli Mensing koma e.t.v. ekki illa við Melsungenliðið í kvöld þar sem það hefur þegar tryggt sér efsta sæti F-riðils Evrópudeildarinnar. Hinsvegar á liðið mikilvægan leik á heimavelli við Flensburg á föstudaginn í þýsku 1. deildinni.
- Auglýsing -
