- Auglýsing -
- Teitur Örn Einarsson er kominn á fulla ferð eftir meiðslin sem héldu honum frá keppni í tvo mánuði. Hann skoraði tvö mörk í gærkvöld þegar Gummersbach, undir stjórn Guðjóns Vals Sigurðssonar, vann IK Sävehof í Partille í Svíþjóð, 28:25, í H-riðli Evrópudeildar. Elliði Snær Viðarsson lék ekki með vegna meiðsla.
- Tryggvi Þórisson skoraði eitt mark fyrir Sävehof í leiknum. Sävehof og FH eru úr leik í H-riðli. Gummersbach og Fenix Toulouse taka sæti í 16-liða úrslitum.
- Guðmundur Bragi Ástþórsson skoraði 3 mörk fyrir Bjerringbro/Silkeborg í gærkvöld þegar liðið gerði jafntefli, 25:25, við Górnik Zabrze í sjöttu og síðustu umferð B-riðils Evrópudeildar karla í handknattleik. Leikið var í Póllandi. Bæði lið hafa lokið þátttöku í Evrópudeildinni á tímabilinu. Montpellier og Granollers fóru áfram í 16-liða úrslit um riðlinum.
- Stiven Tobar Valencia skoraði 2 mörk fyrir Benfica í átta marka tapi liðsins fyrir Limoges í C-riðli Evrópudeildarinnar í gærkvöld. Benfica og Limoges voru komin áfram í 16-liða úrslit fyrir leikina í gærkvöld.
- Óðinn Þór Ríkharðsson átti stórleik með Kadetten Schaffhausen í stórsigri á Tatran Presov á heimavelli, 39:26, í C-riðli Evrópudeildarinnar. Óðinn Þór skoraði 10 mörk í 11 skotum. Kadetten er úr leik í keppninni eins og Presov.
- Arnar Freyr Arnarsson skoraði 2 mörk og Elvar Örn Jónsson eitt fyrir Melsungen í tveggja marka tapi fyrir Vardar í F-riðli Evrópudeildarinnar í gær, 32:30. Leikið var í Skopje. Melsungen hafði fyrir leikinn tryggt sér efsta sæti riðilsins og sæti í 16-liða úrslitum. Tapið í Skopje hafði engin áhrif þar á. Vardar situr eftir, hafnaði í þriðja sæti.
- Þorsteinn Leó Gunnarsson skoraði 3 mörk fyrir Porto í sigri á Val í F-riðli í Porto. Þorsteinn og félagar halda áfram keppni í 16-liða úrslitum sem leikin verða í fjórum fjögurra liða riðlum í febrúar og mars.
Evrópudeild karla “24 – riðlakeppni 32-liða – 6. umferð, úrslit
- Auglýsing -
