- Auglýsing -
- Berta Rut Harðardóttir og Jóhanna Margrét Sigurðardóttir landsliðskona hafa fengið nýja þjálfara hjá félagsliði sínu, Kristianstad HK. Uffe Larsson hefur tekið við þjálfun liðsins af Bjarne Jakobsen sem var kominn á endastöð og mátti taka hatt sinn og staf í vikunni. Eins og kom fram á dögunum var kominn kurr í leikmenn liðsins í kjölfar slaks árangurs liðsins sem tapað hefur fimm leikjum í röð í deildinni auk viðureigna við Val í 32-liða úrslitum Evrópubikarkeppninni um miðjan þennan mánuð.
- Andri Már Rúnarsson skoraði þrjú mörk og gaf þrjár stoðsendingar þegar lið hans SC DHfK Leipzig tapaði, 36:31, fyrir Eisenach á heimavelli í þýsku 1. deildinni í handknattleik í gærkvöld. Viggó Kristjánsson skoraði tvö mörk og átti tvær stoðsendingar. Rúnar Sigtryggsson er þjálfari Leipzig sem situr í 11. sæti deildarinnar með 12 stig eftir 11 leiki. Eisenach hefur einnig unnið sér inn 12 stig.
- Elvar Ásgeirsson skoraði eitt mark og gaf eina stoðsendingu fyrir Ribe-Esbjerg þegar liðið tapaði á heimavelli, 32:29, á heimavelli í 13. umferð dönsku úrvalsdeildarinnar í gær. Ágúst Elí Björgvinsson varði 4 skot, 33%, þann tíma sem hann var í marki Ribe-Esbjerg.
- Ribe-Esbjerg er í næst neðsta sæti dönsku úrvalsdeildarinnar með þrjú stig. Stöðuna í dönsku úrvalsdeildinni og í fleiri deildum evrópsks handknattleiks er að finna hér.
- Nieke Kühne, samherji íslensku landsliðskvennanna, Andreu Jacobsen og Díönu Daggar Magnúsdóttur, varð að draga sig út úr þýska landsliðinu sem tekur þátt í EM. Kühne er meidd á hné og er útilokað að hún taki þátt í leikjum landsliðsins á EM. Sem stendur hefur Markus Gaugisch þjálfari þýska landsliðsins ekki kallað inn leikmann í stað Kühne.
- Gaugisch fór með 17 leikmenn til Innsbruck og hefur þar með úr 16 leikmönnum að spila. Hann getur hvenær sem er kallað tvo leikmenn inn í liðið á meðan riðlakeppnin stendur yfir eða síðar komist þýska landsliðið í milliriðla.
- Íslenska landsliðið mætir þýska landsliðinu á Evrópumótinu í Innsbruck á þriðjudagskvöldið klukkan 19.30.
- Auglýsing -
