- Auglýsing -
- Janus Daði Smárason og félagar í Pick Szeged unnu Carbonex-Komló, 33:28, í 13. umferð ungversku 1. deildinni í handknattleik í gær. Janus Daði skoraði þrjú mörk í leiknum. Pick Szeged stendur þar með jafnt Veszprém í öðru af tveimur efstu sætum deildarinnar.
- Ólafur Andrés Guðmundsson skoraði þrjú mörk í þremur skotum þegar lið hans HK Karlskrona vann Skövde, 31:30, á heimavelli í sænsku úrvalsdeildinni í handknattleik í gær. Dagur Sverrir Kristjánsson skoraði ekki mark leiknum. Þorgils Jón Svölu Baldursson var ekki í leikmannhópi Karlskrona. Phil Döhler fyrrverandi markvörður FH stóð í marki Karlskrona í skamman tíma og varði þrjú af sex skotum sem hann fékk á sig.
- Tryggvi Þórisson var ekki í leikmannhópi IK Sävehof annan leikinn í röð í gær þegar liðið tapaði fyrir Guif, 31:30, í sænsku úrvalsdeildinni. Leikurinn fór fram í Eskilstuna. Óli Mittún var markahæstur hjá Sävehof með sjö mörk.
- Karlskrona og Sävehof er jöfn að stigum í öðru og þriðja sæti sænsku úrvalsdeildarinnar með 17 stig hvort eftir 14 leiki. Stöðuna í sænsku úrvalsdeildinni og í fleiri deildum evrópsks handknattleiks er að finna hér.
- Spænski handknattleiksmaðurinn Valero Rivera hefur skrifað undir nýjan samning við franska liðið Nantes sem gilidir út leiktíðina 2026. Rivera, sem er sonur fyrrverandi landsliðsþjálfara Spánar og Katar, hefur leikið með Nantes frá 2018. Hann var áður hjá félaginu frá 2010 til 2016 en fór til Barcelona 2016 og var í tvö ár en sneri síðan aftur til Nantes. Rivera verður fertugur í febrúar á næsta ári.
- Tvö af þremur efstu liðum úrvalsdeildar karla í handknattleik í Norður Makedóníu, Eurofarm Pelister og Vardar, mætast á morgun á heimavelli Pelister í Bitola. Gríðarlegur áhugi er fyrir leiknum. Til marks um þá seldust 5000 aðgöngumiðar á sjö mínútum og er fyrir vikið uppselt.
- Nils Kretschmer leikmaður þýska 2. deildarliðsins Großwallstadt hefur verið úrskurðaður í leikbann eftir að vísbendingar um notkun ólöglegra lyfja fannst í sýni sem tekið var af honum í lyfjaprófi á dögunum. Meðan beðið er niðurstöðu úr B-sýni fer Kretschmer ótímabundið í leikbann. Þegar niðurstaða liggur yfir tekur lyfjanefnd þýska handknattleikssambandsins við málinu og fellir dóm. Kretschmer, sem er 31 árs, kom til Großwallstadt í sumar frá Elbflorenz.
- Auglýsing -
