- Auglýsing -
Þýski landsliðsmarkvörðurinn Andreas Wolff bíður eftir því að eiginkona hans fæði barn þeirra á allra næstu dögum. Vonir standa til þess að barnið komi í heiminn áður en þýska landsliðið hefur keppni á heimsmeistaramótinu í handknattleik á næstu dögum. Þjóðverjar eiga fyrsta leik á HM gegn Póllandi eftir viku í Jyske Bank Boxen í Herning en farið verður frá Þýskalandi á mánudaginn.
- Enn einn leikmaðurinn úr sænska handboltanum reynir fyrir sér í þýsku 1. deildinni á næsta keppnistímabili. Oskar Joelsson hefur samið við Eisenach frá og með næstu leiktíð. Joelsson er einn aðsópsmesti leikmaður Ystads, efsta liðs sænsku úrvalsdeildarinnar með 88 mörk og 51 stoðsendingu í leikjum liðsins á þessu keppnistímabili.
- Króatíski landsliðsmaðurinn Mateo Maraš flytur til Parísar í sumar. Hann hefur samið við PSG og kveður þar með ungverska liðið Tatabánya eftir þriggja ára vist. Maraš er í HM-hópi Króata sem er undir stjórn Dags Sigurðssonar.
- Franski handknattleiksmaðurinn Nikola Karabatic sem lagði skóna á hilluna eftir Ólympíuleikana í sumar eftir einstakan feril verður viðloðandi heimsmeistaramót karla í handknattleik sem hefst í næstu viku í Danmörku, Króatíu og Noregi. Karabatic hefur verið munstraður upp í áhöfn útgerðar sjónvarpsstöðvarinnar beIN SPORTS.
- Áfram er norski handknattleiksmaðurinn Sander Sagosen sterklega orðaður við danska meistaraliðið Aalborg Håndbold. Sagosen hefur leikið með Kolstad í heimalandi sínu frá 2023. Hann þekkir vel til í Álaborg enda lék hann með liði félagsins frá 2014 til 2017.
- Auglýsing -
