- Auglýsing -
- Sandra Erlingsdóttir skoraði fjögur mörk úr vítaköstum þegar lið hennar TuS Metzingen gerði jafntefli á útivelli við Thüringer HC, 28:28, í þýsku 1. deildinni í handknattleik í gærkvöld. Sandra átti einnig eina stoðsendingu í leiknum.
- TuS Metzingen hefur sótt hressilega í sig veðrið upp á síðkastið eftir þjálfaraskiptinu síðla síðastar ár. Liðið er í sjöunda sæti með 14 stig eftir 14 leiki. Thüringer HC er í öðru sæti en stigið dugði liðinu til þess að skríða upp fyrir Dortmund.
- Blomberg-Lippe vann góðan liðssigur á Dortmund, 29:25, á heimavelli í gærkvöld í þýsku 1. deildinni. Andrea Jacobsen og Díana Dögg Magnúsdóttir léku ekki með Blomberg. Báðar eru þær meiddar um þessar mundir, Andrea á ökkla en Díana er ristarbrotin, eins kom fram á handbolti.is í fyrradag.
- Blomberg-Lippe situr í fjórða sæti með 19 stig eftir 14 leiki, er tveimur á eftir Dortmund sem fatast hefur flugið upp á síðkastið eftir að hafa flogið hátt framan af vetri. Meistarar Ludwigsburg eru efstir með 24 stig.
- Elín Jóna Þorsteinsdóttir landsliðsmarkvörður varði sjö skot, 38,8% þann tíma sem hún var í marki Aarhus Håndbold í gærkvöld í þriggja marka tapleik liðsins fyrir Skanderborg Håndbold á útivelli, 29:26, í dönsku úrvalsdeildinni í handknattleik. Skanderborg Håndbold var marki yfir að loknum fyrri hálfleik, 14:13.
- Elín Jóna og félagar í Aarhus Håndbold sitja í 10. sæti af 14 liðum dönsku úrvalsdeildarinnar með sjö stig eftir 14 leiki. Grannliðið, Skanderborg, er tveimur stigum ofar. Odense Håndbold er efst með 28 stig og meistarar Esbjerg koma þar á eftir með 26 stig.
- Auglýsing -
