Aðalsteini Eyjólfssyni var í kvöld sagt upp starfi þjálfara þýska handknattleiksliðsins GWD Minden. Hann tók við þjálfun Minden í sumar en því miður hefur gengi liðsins ekki verið eins og best verður á kosið. Minden sem féll úr efstu deild í síðasta vor situr um þessar mundir í 15. sæti af 18 liðum næst efstu deildar með 11 stig eftir 19 leiki, aðeins fimm stigum á undan neðsta liðinu.
Aðalsteinn kom til Minden eftir þrjú ár í Sviss og m.a. tvo meistaratitla. Hann átti að byggja lið GWD Minden upp á nýjan leik eftir fallið. Það tókst honum ekki af ýmsum ástæðum. Þess vegna þykir forráðamönnum félagsins rétt að skipta um skipstjóra í brúnni meðan keppni liggur niðri. Mann sem getur e.t.v. snúið gæfuhjólinu í rétta átt þegar keppni í deildinni hefst aftur í byrjun febrúar.
Tveir íslenskir handknattleiksmenn eru á mála hjá GWD Minden, Bjarni Ófeigur Valdimarsson og Sveinn Jóhannsson.
