Stefán Arnar Gunnarsson handknattleiksþjálfari og kennari er látinn 44 ára að aldri. Arnar fannst látinn á dögunum en hans hafði verið saknað frá 3. mars.
Arnar ólst upp á Akureyri og hóf ungur að æfa og leika handknattleik. Snemma tók hann til við þjálfun sem varð upp frá því hans annað starf og eitt helsta áhugamál.
Arnar þjálfaði m.a. hjá Þór, Selfossi, Fjölni og HK, börn, unglinga og fullorðna. M.a. vann karlalið Fjölnis sér sæti í efstu deild í fyrsta sinn undir stjórn Arnars vorið 2017.
Arnar þjálfaði félagslið í Bergen, hjá þýska liðinu HSG Krefeld 2019 – 2020 og Neistan í Færeyjum 2020 til 2022. Bæði árin lék Neistin til úrslita í bikarkeppninni í karlaflokki. Á síðasta sumri þjálfaði Arnar U17 ára landslið Íslands í karlaflokki sem tók þátt í Ólympíudögum Evrópuæskunnar í Slóvakíu.
Í ársbyrjun 2020 útskrifaðist Arnar með Master Coach gráðu sem er æðsta gráða í alþjóðlegum handbolta á vegum Handknattleikssambands Evrópu.
Eftir að handbolti.is fór í loftið í september 2020 var Arnar í reglulegu og góðu sambandi um hvað eina sem snerti handknattleik. Hann skrifaði einnig greinar sem birtust á handbolti.is. Í þeim setti Arnar fram hugmyndir að breyttu skipulagi á keppni á Íslandsmótum fullorðinna og ungmenna. Nokkuð sem var hans hjartansmál.
Að leiðarlokum þakkar handbolti.is Arnari fyrir samfylgdina og vottar ættingjum hans og vinum dýpstu samúð.
Ívar Benediktsson, ritstjóri handbolti.is.
