Arnar Birkir Hálfdánsson er í fimmta sæti á lista yfir þá leikmenn sænsku úrvalsdeildarinnar í handknattleik karla sem gefið hafa flestar stoðsendingar í leikjum deildarinnar fram til þessa. Arnar Birkir er skráður fyrir 63 sendingum. Efstur er Pontus Zetterman leikmaður Önnereds með 88 sendingar, 14 fleiri en Axel Månsson leikmaður Lugi sem er í öðru sæti.
Arnar Birkir hefur ekki látið sér nægja að vera drjúgur við að mata samherja sína á sendingum sem skilað hafa mörkum. Hann er níundi markahæsti leikmaður deildarinnar með 84 mörk í 16 leikjum. Jonas Samuelsson, Skövde, er lang markahæstur með 114 mörk. Axel Månsson er þar á eftir með 93 mörk. Stoðsendingakóngurinn Pontus Zetterman situr í þriðja sæti með 92 mörk.
Alls hefur Arnar Birkir komið að 147 mörkum af þeim 486 sem Amo Handboll hefur skoraði í úrvalsdeildinni til þessa.
Arnar Birkir gekk til liðs við Amo Handboll í sumar eftir eins árs veru hjá Ribe-Esbjerg. Amo kom upp í úrvalsdeildina í vor. Liðið situr í 11. sæti af 14 liðum deildarinnar um þessar mundir. Eftir að hafa farið vel af stað í haust vonast handbolti.is til að taka ekki of djúpt í árinni með því að skrifa að Amo hafi aðeins fatast flugið síðustu vikur. M.a. var skipt um þjálfara í byrjun desember.
Þjálfari Arnars Birkis varð að taka pokann sinn
