Arnór Snær Óskarsson var aðeins einu marki frá markameti Íslendings í Evrópuleikjum í handknattleik, er hann skoraði 13 mörk fyrir Val gegn sænska liðinu Ystads í Evrópudeildinni, 29:32, að Hlíðarenda í gærkvöld.
Fjórir leikmenn hafa skorað 14 mörk í Evrópuleik með íslensku liði:
1996-1997: Julian Róbert Duranona, KA, gegn Fotex Veszprém frá Ungverjalandi.
2001-2002: Halldór Ingólfsson, Haukum, gegn Barcelona frá Spáni.
2006-2007: Jóhann Gunnar Einarsson, Fram, gegn Celje frá Slóveníu.
2016-2017: Josip Juric Gric frá Króatíu, Val, gegn HC Sloga Pozeha frá Serbíu.
9 Valsmenn yfir 10 mörk
Arnór Snær er níundi Valsmaðurinn sem skorar yfir 10 mörk í Evrópuleik síðan að Sigurður Valur Sveinsson gerði það fyrst; skoraði 11 mörk í leik gegn svissneska liðinu Amicitia 1988.
Baldvin Þorsteinsson hefur oftast Valsmanna skorað meira en 10 mörk í leik, eða fjórum sinnum: 10, 11, 11 og 10 mörk.
Baldvin og Fannar Friðgeirsson brutu báðir 10 marka múrinn í sama leiknum. Fannar skoraði 12 mörk og Baldvin 10 gegn Tíblisi frá Georgíu, 51:15, 2005.
Geir sá fyrsti
Geir Hallsteinsson var fyrsti Íslendingurinn til að skora yfir 10 mörk í Evrópuleik. Hann skoraði 13 mörk gegn Honved frá Ungverjalandi í Laugardalshöllinni 1969, 17:21. Hinir sem skoruðu í leiknum, voru Ragnar Jónsson 2, Örn Hallsteinsson og Guðlaugur Gíslason eitt hvor.
Þrír aðrir sem skoruðu 13 mörk í leik, eru:
1987-1988: Gylfi Birgisson, Stjörnunni.
1996-1997: Julian Róbert Duranona, KA.
2017-2018: Theodór Sigurbjörnsson, ÍBV.
Duranona fimm sinnum yfir 10 mörk
Julian Róbert Duranona, KA, hefur fimm sinnum brotið 10 marka múrinn í leik. Fyrst 12 mörk í leik 1995-1996 og þá í fjórum leikjum í röð 1996-1997; 13, 11, 14 og 10 mörk.
