FH vann Val í æfingaleik í Kaplakrika á föstudaginn, 30:22. Aron Pálmarsson lék með og var afar öflugur sem undirstrikar enn einu sinni hversu mikill hvalreki heimkoma Arons verður, bæði fyrir FH og Olísdeildina.
Nokkuð vantaði þó upp á að Valur væru með alla sína bestu menn, eftir því sem glöggur velunnari handbolta.is, sem var á leiknum, greindi frá.
Talsverður fjöldi fólks fylgdist með leiknum. Virðist ljóst að mikil eftirvænting ríkir fyrir næsta keppnistímabili og að koma Arons og Alexanders Peterssonar mun auka verulega á áhugann.
Flautað verður til leiks á Hafnarfjarðarmóti karla í handknattleik þriðjudaginn 22. ágúst með sannkölluðum stórleik FH og Íslandsmeistara ÍBV. Einnig taka Haukar og Hörður þátt í Hafnarfjarðarmótinu í karlaflokki sem að vanda er eitt gleggsta merki þess að handknattleiksvertíðin er á næsta leiti.
Leikjadagskrá Hafnarfjarðarmótsins 2023.
Leikjadagskrá Olísdeildar karla.
