„Við áttum bara alls ekki góðan leik,“ sagði Karen Tinna Demian leikmaður ÍR við handbolta.is í kvöld eftir að ÍR tapaði með níu marka mun fyrir efsta liði Olísdeildar kvenna, Haukum, 34:25, á Ásvöllum í sjöundu umferð.
ÍR-ingar lentu snemma fimm mörkum undir og náðu aldrei að vinna sig út úr því þótt liðið hafi vissulega náð góðum kafla um skeið í fyrri hálfleik og minnkað muninn í þrjú mörk. Haukar sóttu í sig veðrið á ný og voru átta mörkum yfir í hálfleik, 18:10.
Máttum vera óhræddari
„Við máttum oft vera óhræddari við að sækja á markið. Það var óöryggi í leik okkar. Í stað þess að vera ákveðnar og keyra á vörn Hauka þá urðum við passívar. Um leið og okkur tókst aðeins að vera ákveðnari þá fór leikur okkar að tikka.
Hinsvegar töpuðum við boltanum alltof oft og gerðum of marga tæknifeila þegar litið er á leikinn í heild,“ sagði Karen Tinna sem þótt munurinn í leikslok vera óþarflega mikill þótt vissulega hafi nýliðarnir verið að glíma við efsta lið Olísdeildarinnar.
Uppstilltur sóknarleikur viðráðanlegur
„Það er bara veisla fyrir lið eins og Hauka að fá boltann á silfurfati. Það hleypur út í eitt eins og liðin hans Stebba vilja gjarnan gera. Uppstilltur sóknarleikur Hauka var hinsvegar alveg viðráðanlegur. Það var frekar hraðaupphlaupin og seinni bylgjan sem færði Haukum öruggan sigur,“ sagði Karen Tinna ennfremur.
Gáfust aldrei upp
Þrátt fyrir að ÍR-ingar væru að klífa þrítugan hamarinn og sæktist það hægt þá gafst liðið aldrei upp.
„Við teljum okkur alveg hafa lið til þess að keppa við Hauka en til þess verðum við að leika betur en að þessu sinni. Því miður voru of margir leikmenn hjá okkur sem voru off. Auk þess er erfitt að eiga við Hauka þegar Elín Klara er á fullri ferð frá upphafi til enda,“ sagði Karen Tinna sem tók undir með blaðamanni að ÍR-liðið kynni best við sig á heimavellinum, Skógarseli. „Þar er okkar vígi,“ sagði Karen Tinna Demian eftir tap ÍR-inga á Ásvöllum í kvöld.
Myndskeið: Annar sigur KA/Þórs, Stjarnan af botninum og öruggt hjá Haukum
Leikjavakt: Þrjár viðureignir í 7. umferð
