Í lok nóvember var tilkynnt að landsliðsmaðurinn Elvar Örn Jónsson hafi skrifað undir þriggja ára samning við þýsku meistarana SC Magdeburg. Hann kveður Melsungen í vor eftir fjögurra ára veru. Liðið hefur aldrei staðið betur að vígi á þessu tíma árs, situr í efsta sæti þýsku 1. deildarinnar og virðist til alls líklegt að hrifsa meistaratignina af Magdeburg.
Í stóru hlutverki
„Auðvitað verður erfitt að kveðja í vor. Mér hefur liðið mjög vel hjá Melsungen enda verið í stóru hlutverki undanfarin ár. Það hefur verið stígandi í liðinu ár frá ári. Sérstaklega hefur gengið vel hjá okkur í vetur sem hefur komið mörgum í opna skjöldu. Eftir HM verðum við að reyna að halda áfram eins og síðustu mánuði,“ sagði Elvar Örn sem segir enn langt í að titlinum verði fagnað þótt staðan sé góð núna.
„Við sjáum til hver staðan verður í mars eða apríl og setjum okkur þá ákveðið markmið,“ sagði Elvar Örn með bros á vör.
