Afturelding verður án tveggja leikmanna næstu vikurnar eftir að þeir meiddust í viðureign liðsins við KA í átta liða úrslitum Poweradebikarsins í KA-heimilinu í fyrrakvöld. Bergvin Þór Gíslason fékk þungt högg á aðra öxlina og Þorsteinn Leó Gunnarsson meiddist á vinstri ökkla.
Var logandi hræddur
„Ég var logandi hræddur um að Þorsteinn hefði annað hvort brotnað eða slitið liðband. Sem betur reyndist svo ekki vera. Segja má að betur hafi farið en áhorfðist í fyrstu þótt vissulega séu meiðslin slæm,“ sagði Gunanr Magnússon þjálfari Aftureldingar við handbolta.is fyrir stundu.
Fer í skoðun eftir helgi
„Þorsteinn verður frá í einhverjar vikur og einnig Bergvin Þór sem fer í ýtarlega skoðun eftir helgina. Að henni lokinni skýrist betur hvers eðlis meiðsli hans eru. Vonandi eru þau ekki alvarleg. Engu að síður er ljóst að hann verður frá um tíma. Spurningin er bara hversu lengi,“ sagði Gunnar ennfremur sem þykir afleitt að missa þessa tvo leikmenn út á sama tíma enda báðir í líkum hlutverkum hjá Aftureldingarliðinu.
Þungu fargi létt
Gunnar sagði hinsvegar að þungu fari væri af honum og leikmönnum létt eftir að þeir unnu sér inn sæti í undanúrslitum Poweradebikarsins sem leikin verða 16. mars.
