Efnilega stórskytta Aftureldingar, Þorsteinn Leó Gunnarsson, snerist illa á vinstri ökkla um miðjan síðari hálfleik í viðureign Aftureldingar og KA í átta liða úrslitum Poweradebikarsins í KA-heimilinu í kvöld. Þorsteinn Leó kom illa niður á vinstri fótinn eftir að hafa skotið að marki KA. Dágóð stund leið meðan hugað var að Þorsteini áður en hann var borinn af leikvelli í sjúkrabörum.
Rakleitt eftir að Þorsteinn Leó var kominn af leikvelli var ökklinn kældur. Framundan er skoðun hjá lækni en ekki er hægt að útiloka að Þorsteinn verði frá keppni um skeið. Alltént virtist Þorsteinn Leó koma illa niður þegar upptaka af atvikinu er skoðuð.
Skiljanlega kom Þorsteinn Leó ekkert meira við sögu í leiknum. Staðan var jöfn í leiknum, 19:19, þegar Þorsteinn Leó meiddist. Hann hafði þá skorað fjögur mörk.
Afturelding vann eftir framlengingu og er komin í undanúrslit Poweradebikarsins sem fram fara fimmtudaginn 16. mars.
