UPPFÆRT: ÖLLUM LEIKJUM KVÖLDSINS HEFUR VERIÐ FRESTAÐ VEGNA VEÐURS!
Rauð veðurviðvörun! – HSÍ frestar öllum kappleikjum
„Enn sem komið er þá eru allir leikir á áætlun,“ segir Róbert Geir Gíslason framkvæmdastjóri HSÍ er hann var spurður hvort leikirnir fjórir sem eiga að fara fram í átta liða úrslitum Powerade-bikarkeppni kvenna í handknattleik raskist vegna einstaklega slæms veðurs, ofsaveðurs með roki og rigningu, sem á að ganga yfir landið allt eftir hádegið í dag. Appelsínugul viðvörun er fyrir landið allt í dag og fram eftir morgundegi.
Á vef Veðurstofunnar segir m.a.: „Vaxandi sunnanátt eftir hádegi með rigningu eða slyddu, sunnan og suðvestan 20-28 í kvöld, en hvassari á stöku stað og hviður yfir 40 m/s. Talsverð rigning.“
Þrír af fjórum leikjum kvöldsins í Poweradebikarnum eiga að fara fram á höfuðborgarsvæðinu. Fjórða viðureignin verður í Vestmannaeyjum. Bikarmeistarar Vals sækja leikmenn ÍBV heim. Ágúst Þór Jóhannsson þjálfari Vals sagði í svari við skilaboðum frá handbolta.is að Valsliðið hafi farið til Vestmannaeyja í gærkvöld. Ekki er útilokað að Valsliðið verði í Eyjum fram á helgina vegna þess að til stendur að liðin mætist í Olísdeild kvenna í íþróttamiðstöðinni í Vestmannaeyjum á föstudagskvöld.
Leikir kvöldsins
Powerade-bikar kvenna, 8-liða úrslit:
Vestmannaeyjar: ÍBV – Valur, kl. 18.
Skógarsel: ÍR – Haukar, kl. 19.30.
Lambhagahöllin: Fram – Stjarnan, kl. 19.30.
Safamýri: Víkingur – Grótta, kl. 20.
- Leikir kvöldsins verða sendir út á Handboltapassanum að viðureign Fram og Stjörnunnar undanskilinni sem til stendur að verða varpað í loftið á RÚV2.
