Tveir hörkuspennandi leikir eru á dagskrá Íslandsmótsins í handknattleik í kvöld enda stendur úrslitakeppnin nánast sem hæst um þessar mundir. Leikið verður öðru sinni til úrslita um Íslandsmeistaratitilinn í handknattleik kvenna í Origohöll Valsmann á Hlíðarenda klukkan 18. Tveimur stundum og stundarfjórðungi síðar brestur á oddaleikur Aftureldingar og Hauka í undanúrslitum Olísdeildar karla í Mosfellsbæ. Sigurliðið leikur til úrslita við ÍBV um Íslandsmeistaratitilinn.
Eins og kom fram á handbolta.is í morgun er uppselt á viðureign Aftureldingar og Hauka.
Nóg er til af aðgöngumiðum á viðureign Vals og ÍBV í Orgiohöllinni og ekki úr vegi að storma á leikinn en hafa ber í huga að tafir kunna að vera á umferð vegna leiðtogafundar Evrópuráðsins sem fram fer í Reykjavík.
Hefur harma að hefna
Valur vann fyrstu viðureignina við ÍBV örugglega í Vestmannaeyjum á síðasta föstudag, 30:23. ÍBV-liðið hefur harma að hefna eftir tapið á heimavelli og verður vinna til þess að forðast að vera komið með bakið upp að veggnum umtalaða. Staða sem ekki þykir eftirsóknarverð.
Leikir kvöldsins
Olísdeild kvenna, úrslit, leikur tvö:
Origohöllin: Valur – ÍBV (1:0) , kl. 18 – sýndur á Stöð2sport.
Olísdeild karla, undanúrslit, oddaleikur:
Varmá: Afturelding – Haukar (2:2), kl. 20.15 – sýndur á Stöð2sport.
