Fyrri viðureign deildarmeistara Hauka og Vals um Íslandsmeistaratitilinn í handknattleik fer fram í kvöld í Origohöll Valsmanna. Flautað verður til leiks klukkan 19.30.
Liðin unnu sitt hvorn leikinn þegar þau mættust í Olísdeildinni á keppnistímabilinu en Haukar eru einu marki yfir.
Valsmenn höfðu betur þegar þeir sóttu Hauka heim í Schenkerhöllina í 4. umferð föstudaginn 2. október, rétt áður en öllu var skellt í lás í haust. Lokatölur í leiksins, 28:25.
Brynjólfur Snær Brynjólfssson, Heimir Óli Heimisson og Orri Freyr Þorkelsson voru markahæstir hjá Haukum með fimm mörk hver. Magnús Óli Magnússon og Agnar Smári Jónsson skoruðu átta mörk hvor fyrir Val og voru markahæstir. Sá síðarnefndi kemur inn í lið Vals í kvöld eftir að hafa tekið út leikbann þegar Valur og ÍBV mættust öðru sinni í undanúrslitum á síðasta föstudag.
Haukar gerðu góða ferð í Origohöllina 21. mars og tókst að hefna fyrir tapið í byrjun október og unnu með fjögurra marka mun, 32:28, í 15. umferð Olísdeildarinnar. Adam Haukur Baumruk var markahæstur Hauka með sjö mörk og Stefán Rafn Sigurmannsson var næstur með sex mörk. Óvíst er hvort að Stefán Rafn taki þátt í úrslitaleikjunum tveimur sem framundan eru vegna meiðsla sem hann hlaut í síðari undanúrslitaleiknum við Stjörnuna á föstudaginn var.
Anton Rúnarsson var markahæstur Valsmanna með sjö mörk. Agnar Smári skoraði fimm mörk. Hann virðist kunna vel við sig í leikjum gegn Haukum eftir marka má viðureignirnar tvær á keppnistímabilinu.
Leikur kvöldsins, undanúrslit Olísdeildar karla, fyrri leikur:
Origohöllin: Valur – Haukar, kl. 19.30 – sýndur á Stöð 2 Sport.
Vinningsröð liða þegar miðað er við Evrópukeppnisfyrirkomulag.
1.Stigasöfnun:
Lið vinnur sér inn stig sem hér segir:
a)sigur, 2 stig.
b)jafntefli, 1 stig.
c)tap, 0 stig.
2.Vinningsröð liða:
Ef liðin hafa jafnmörg stig eftir tvo leiki verður ekki framlengt. Þá verður vinningsröðin, þ.e. hvort liðið verður Íslandsmeistari ákveðin í þessari röð:
a)markamismunur.
b)fleiri mörk skoruð á útivelli.
c)vítakastkeppni.
Fara skal eftir leikreglum HSÍ og IHF um framkvæmd vítakastkeppni.
