- Auglýsing -
- Díana Ágústsdóttir hefur skrifað undir nýjan tveggja ára samning við handknattleiksdeild Víkings. Díana, sem er uppalinn Víkingur, kom aftur til félagsins sumarið 2022 eftir að hafa reynt fyrir sér með Fjölni, Fram og Haukum um nokkurra ára skeið. Víkingur er sem stendur í þriðja sæti Grill 66-deildar.
- Einn þekktasti handknattleiksmaður Dana og lykilmaður í landsliðinu fyrir nokkrum árum, René Toft Hansen, er enn að leika handbolta þótt landsliðsferlinum hafi lokið fyrir fáeinum árum. Hansen, sem er 39 ára gamall, hefur framlengt samning sinn við danska úrvalsdeildarliðið Bjerringbro-Silkeborg til eins árs, fram á sumarið 2025.
- Danski landsliðsmarkvörðurinn Niklas Landin útilokar ekki að fyrr en síðar hætti hann að leika með landsliðinu. Landin hefur árum saman verið aðalmarkvörður danska landsliðsins og einn allra besti markvörður heims. Hann stóð í skugga Emil Nielsen á nýliðnu Evrópumóti. Nielsen varð að margra mati besti markvörður Evrópumótsins þótt hann hafi ekki hlotið náð fyrir augum þeirra sem völdu úrvalslið mótsins.
- Eins kátur og franski handknattleiksmaðurinn Nikola Karabatic var þegar hann bætti markamet Guðjóns Vals Sigurðssonar á Evrópumóti í handknattleik um mitt mótið fyrr í þessum mánuði þá áttaði Karabatic sig ekki á því fyrr en um seinan að Mikkel Hansen fór upp fyrir hann í úrslitaleik Frakka og Dana á sunnudaginn.
- Karabatic var að taka þátt í Evrópumóti í síðasta sinn og ætlaði sér að ljúka keppni sem markahæsti leikmaður EM-sögunnar. Hansen komst einu marki upp fyrir Frakkann, hefur skoraði 296 mörk en Karabatic 295. Guðjón Valur skoraði 288 mörk á EM frá 2000 til 2021 en í talsvert fleiri leikjum en Karabatic.
- Anel Mahmutefendic sem vinnur sem aðstoðarþjálfari Guðjóns Vals Sigurðssonar hjá þýska 1. deildarliðinu Gummersbach söðlar um í sumar. Hann hefur ákveðið að taka við þjálfun HC Empor Rostock sem leikur í 2. deild og Tumi Steinn Rúnarsson m.a. leikur með.
- Auglýsing -
