Kristján Örn Kristjánsson, Donni, landsliðsmaður í handknattleik og leikmaður franska liðsins PAUC er kominn í frí frá handknattleik um stundarsakir. Donni sagði frá þessu í samtali við Vísir/Stöð2 í kvöld.
Þar kemur fram að Donni hafi átt andlega erfitt síðustu vikur. Álagi sé um að kenna. Hann hafi orðið fyrir spennufalli eftir heimsmeistaramótið auk þess sem samband hans við þjálfarann sé ekki eins og best verður á kosið.
„Svo kom ég aftur í klúbbinn minn og ákveðin vandamál þar eru að vega svolítið þungt hjá mér. Það besta í stöðunni var að taka mér smá leyfi og sjá hvort þetta batni aðeins,“ sagði Donni við Vísir.
Donni nýtur stuðnings stjórnenda PAUC en mætir litlum sem engum skilningi hjá þjálfaranum, hinum gamalreynda Thierry Anti.
Af þessu má ráða að Donni verður ekki með PAUC þegar liðið mætir Val í 9. umferð Evrópudeildarinnar í Origohöllinni á þriðjudaginn. Eins verður hann vart með landsliðinu í tveimur leikjum gegn Tékkum í undankeppni EM í fyrri hluta næsta mánaðar.
Donni gekk til liðs við PAUC 2020 frá ÍBV. Í lok mars á síðasta ári framlengdi hann samning sinn við félagið til loka leiktíðarinnar 2024.
