Stjarnan skoraði fimm síðustu mörkin gegn Gróttu í viðureign liðanna í UMSK-bikar kvenna í handknattleik í TM-höllinni í kvöld og tryggði sér þar með sigur í leiknum, 26:23, og um leið annað sætið á mótinu.
Elísabet Millý Elíasardóttir var frábær í marki Stjörnunnar. Hún hreinlega lokaði markinu á lokakafla leiksins sem átti stóran þátt í að Stjarnan sneri við taflinu á síðustu mínútunum. Elísabet Millý varði 18 skot í leiknum.
Afturelding tryggði sér sigur á UMSK-mótinu í gær. Grótta og HK eiga eftir að mætast í mótinu. Hvorugt liðanna hefur krækt í stig til þessa en þau mætast í Kórnum á þriðjudaginn.
Stjarnan var með frumkvæðið í fyrri hálfleik og var marki yfir að honum loknum, 15:14. Leikmenn Gróttu sneru við taflinu strax í byrjun síðari hálfleiks og náðu tveggja til þriggja marka forskoti. Allt virtist leika í lyndi þar til á allra síðustu mínútum að leikurinn snerist í höndum þeirra.
Mörk Stjörnunnar: Eva Björk Davíðsdóttir 8, Embla Steindórsdóttir 7, Anna Karen Hansdóttir 4, Vigdís Arna Hjartardóttir 4, Anna Lára Davíðsdóttir 1, Guðmunda Auður Guðjónsdóttir 1, Helena Rut Örvarsdóttir 1.
Varin skot: Elísabet Millý Elíasardóttir 18.
Mörk Gróttu: Daðey Ásta Hálfdánsdóttir 6, Katrín Anna Ásmundsdóttir 5, Rut Bernódusdóttir 3, Þóra María Sigurjónsdóttir 3, Ída Margrét Stefánsdóttir 2, Katrín Helga Sigurbergsdóttir 2, Karlotta Kjerúlf Óskarsdóttir 1, Ólöf María Stefánsdóttir 1.
Varin skot: Soffía Steingrímsdóttir 6, Anna Karólína Ingadóttir 2.
Staðan í UMSK-móti kvenna.
