Valur hefur náð 10 stig forskoti í efsta sæti Olísdeildar karla eftir fjórtánda sigurinn í 16 tilraun um í KA-heimilinu í kvöld, 36:32, í heimsókn til heimamanna. Jafnt var að loknum fyrri hálfleik, 17:17. Valsmenn hafa 29 stig eftir 16 leiki en FH er næst á eftir með 19 stig en á tvo leiki til góða. KA er í 10. sæti með 11 stig.
Valsmenn voru sterkari síðustu 20 mínúturnar í KA-heimilinu í kvöld. Eftir að KA komst marki yfir, 19:18, þegar nærri tíu mínútur voru liðnar af hálfleiknum svöruðu Valsarar með fimm mörkum í röð. Eftir það voru þeir með ágætt forskot allt til enda í hröðum og skemmtilegum leik.
KA-menn gerðu hvað þeir gátu en eins og fleiri lið hafa fengið að finna fyrir þá er ekki heiglum hent að halda í við Valsmenn, jafnvel þótt þeir hafi í mörg horn að líta eins og um þessar mundir.
Staðan í Olísdeild karla og næstu leikir.
Magnús Óli Magnússon og Tryggvi Garðar Jónsson léku ekki með Val að þessu sinni. Róbert Aron Hostert var heldur ekki með en hann glímir við langvarandi meiðsli – brjósklos í hálsi eins og kom fram fyrir nokkru síðan.
Mörk KA: Ólafur Gústafsson 9, Einar Rafn Eiðsson 8/3, Gauti Gunnarsson 7, Allan Nordberg 2, Dagur Gautason 2, Arnór Ísak Haddsson 1, Skarphéðinn Ívar Einarsson 1, Dagur Árni Heimisson 1, Jens Bragi Bergþórsson 1.
Varin skot: Bruno Bernat 4, 14,8% – Nicholas Satchwell 2, 14,3%.
Mörk Vals: Stiven Tobar Valencia 8, Benedikt Gunnar Óskarsson 7/2, Tjörvi Týr Gíslason 6, Agnar Smári Jónsson 4, Aron Dagur Pálsson 4, Finnur Ingi Stefánsson 3, Þorgils Jón Svölu Baldursson 2, Bergur Elí Rúnarsson 1, Arnór Snær Óskarsson 1.
Varin skot: Sakai Motoki 9, 29% – Björgvin Páll Gústavsson 2, 18,2%.
Handbolti.is fylgdist með leiknum á leikjavakt.
