Ágúst Ingi Óskarsson leikmaður Gróttu var í dag úrskurðaður í eins leiks keppnisbann á fundi aganefndar HSÍ. Ágúst Ingi verður af þeim sökum í banni þegar Grótta sækir KA heim í 18. umferð Olísdeildar á föstudagskvöld. Fjarvera hans veikir Gróttuliðið þar sem Ágúst Ingi hefur verið einn öflugasti leikmaður liðsins á leiktíðinni.
Úrslit leiks KA og Gróttu geta haft mikil áhrif á stöðu liðanna þegar upp verður staðið í vor. Sem stendur eru liðin í áttunda og níunda sæti, Grótta með 13 stig en KA 12, þegar fimm umferðir eru eftir.
Staðan og næstu leikir í Olísdeildum.
Ágúst Ingi fékk útilokun með skýrslu vegna mjög ódrengilegrar hegðunar í leik Gróttu og Víkings í Olísdeild karla á síðasta föstudag vegna brots á síðustu sekúndum leiksins. „Dómarar meta að brotið falli undir reglu 8:10 c),“ segir í úrskurði afanefndar þar sem ennfremur segir:
„Athugasemdir bárust frá Gróttu og hefur aganefnd kynnt sér myndbandsupptöku af brotinu. Samkvæmt reglu 17:11 eru ákvarðanir dómara, byggðar á sýn þeirra á staðreyndum eða mati þeirra, endanlegar. Dómarar leiksins hafa staðfest mat sitt á brotinu, sem m.a. leiddi til að víti var dæmt í leiknum. Með tilvísun í 10. gr. reglugerðar HSÍ um agamál er það niðurstaða aganefndar að leikmaðurinn er úrskurðaður í eins leiks bann.“
Úrskurður aganefndar í dag þar sem fleiri mál voru afgreidd.
