- Auglýsing -
- Willum Þór Þórsson, fyrrverandi heilbrigðisráðherra, gefur kost á sér í embætti forseta ÍSÍ á ársþingi sambandsins 16. og 17. maí. Lárus Blöndal forseti ÍSÍ síðustu 12 ár tilkynnti á dögunum að hann sæktist ekki eftir endurkjöri. Willum, sem féll af Alþingi í kosningunum í lok nóvember, er sá fyrsti sem býður sig fram.
- Hermt er að Jota Gonzalez þjálfari Benfica í Portúgal verði á næstunni ráðinn þjálfari karlalandsliðs Póllands í handknattleik. Michal Sikorsky stýrði pólska landsliðinu í leikjunum í síðustu viku í undankeppni EM. Sikorsky, sem er þjálfari ungmennaliðs Wisla Plock og var aðstoðarþjálfari Marcin Lijewski sem var látinn taka pokann sinn eftir HM í janúar þrátt fyrir að Pólverjar kæmu heim með forsetabikarinn frá mótinu.
- Þýski handknattleiksmaðurinn Felix Danner hefur blásið rykið af keppnin skónum og ætlar að leika með MT Melsungen næstu vikur en sjö leikmenn liðsins er úr leik til skemmri og lengri tíma vegna meiðsla. Danner er 39 ára gamall og lagði skóna á hilluna fyrir fjórum árum. Hann lék með MT Melsungen frá 2009 til 2021.
- Spænski handknattleiksmaðurinn Antonio Seradilla kveður þýska meistaraliðið SC Magdeburg í sumar eftir eins árs veru. Hann kom til félagsins frá Elverum í Noregi. Ekki hefur verið gefið upp hvert Seradilla haldi í sumar en sennilegast er að hann gangi til liðs við félagslið á Spáni.
- Þýska landsliðskonan Alina Grijseels gengur á ný til liðs við Borussia Dortmund í sumar að lokinni tveggja ára dvöl hjá CSM í Búkarest. Grijseels lék með Dortmund frá 2014 til 2023 uns hún kaus að flytja til rúmensku meistaranna.
- Hinn gamalreyndi spænski landsliðsmaður Gedeon Guardiola hefur ákveðið að leggja skóna á hilluna í sumar eftir 22 ár sem atvinnumaður í handknattleik, lengi vel í Þýskalandi. Guardiola hætti að leika með spænska landsliðinu eftir EM 2021 og hafði þá tekið þátt í 203 landsleikjum.
- Auglýsing -
