Styrmir Sigurðsson einn umsjónarmanna hlaðvarpsþáttarins Handkastið segist hafa heimildir fyrir því að Haukar hafi Maksim Akbachev undir smásjá í leit sinni að aðstoðarþjálfara fyrir meistaraflokkslið félagsins. Styrmir sagði frá þessu í nýjasta þætti Handkastsins.
„Ég hef heyrt það að Maksim sé á leiðinni á Ásvelli að aðstoða Ásgeir [Örn Hallgrímsson]. Virkilega áhugaverð ráðning ef af verður. Það fer mjög gott orð af Maksim sem þjálfara,“ sagði Styrmir ennfremur.
Maksim er ekki ókunnugur herbúðum Hauka á Ásvöllum. Hann var aðstoðarþjálfari meistaraflokks karla 2017 til 2020 og kom að þjálfun fleiri flokka á þeim tíma.
Umræðan um Maksim og hugsanlega ráðningu hans til Hauka hefst eftir ca 25,35 mínútur í nýjasta þætti Handkastsins.
Hættur í Barein
Maksim hefur síðasta hálfa árið eða svo verið þjálfari yngri landsliða Barein og var m.a. þjálfari U19 ára landsliðs karla á heimsmeistaramótinu sem fram fór í Króatíu í fyrri hluta síðasta mánaðar. Eins og kom fram á handbolti.is í fyrradag þá er Maksim hættur störfum í Barein.
Haukar sækja Víkinga heim í Olísdeild karla á morgun, föstudag kl. 19.30.
Staðan og leikjadagskrá Olísdeilda.
