„Það er allt að fara úrskeiðis hjá þeim og ég hef miklar áhyggjur af þessu unga liði. Margir þeirra eru óharðnaðir. Þeir tapa og tapa. Sjálfstraustið hlýtur að vera niðri í kjallara. Það getur verið erfitt að rífa sig upp úr því,“ segir Styrmir Sigurðsson um neðsta lið Olísdeildar karla, Selfoss, í nýjasta þætti Handkastsins sem fór í loftið í gærkvöld, rétt eftir að Selfoss tapaði í Sethöllinn fyrir Víkingi, 19:21.
„Þetta kláraði leikinn“
„Í stöðunni 17:19 tóku leikmenn Selfoss vitlausa miðju,“ segir Teddi Ponsa í þættinum og átti ekki orð yfir klaufaskap liðsins. Mistökin urðu til þess að síðasta von Selfossliðsins um að jafna metin fór út í veður og vind. „Þetta kláraði leikinn,“ sagði Ponsa sem var umsjónarmaður Handkastsins en gestur hans og Styrmis að þessu sinni var enginn annar en Atli Már Báruson, öðru nafni læðan.
Selfoss er fjórum stigum á eftir Víkingi og þremur stigum frá HK. Reyndar er Stjarnan í næst neðsta sæti með tvö stig.
Umræðan í Handkastinu um leik Selfoss og Víkings hefst eftir 15 mínútur og þráðurinn er tekinn aftur upp þegar nær dregur 22 mínútu.
