Heiðmar Felixson mun stýra þýska liðinu Hannover-Burgdorf í kvöld þegar það mætir AEK Aþenu í fjórðu umferð B-riðils Evrópudeildarinnar í handknattleik karla. Christian Prokop þjálfari Hannover-Burgdorf er veikur með covid heima hjá sér í Þýskalandi og fór þar af leiðandi ekki með til grísku höfuðborgarinnar.
Þetta er í annað sinn sem Heiðmar, sem hefur verið aðstoðarþjálfari Hannover-Burgdorf frá 2021, stýrir liðinu í forföllum Porkop vegna covid veikinda. Prokop var einnig frá keppni um skeið snemma árs 2022.
Heiðmar er fyrrverandi landsliðsmaður og leikmaður með þýskum og spænskum félagsliðum auk KA.
Hannover-Burgdorf er efst í B-riðli Evrópudeildarinnar með sex stig eftir þrjá leiki. Takist liðinu að vinna AEK í kvöld verður sæti í 16-liða úrslitum í höfn. AEK er í þriðja sæti riðilsins með tvö stig. Hannover-Burgdorf vann fyrri viðureign liðanna í riðlakeppninni, 31:25, á heimavelli.
Evrópudeild karla ’23 – úrslit 3. umferðar – staðan
