„Þetta er stórkostlegt,“ sagði Einar Andri Einarsson annar þjálfara U21 árs landsliðsins við handbolta.is eftir að íslenska landsliðið tryggði sér bronsverðlaunin á heimsmeistaramótinu í handknattleik karla í Berlín í dag.
„Það var mjög sætt að klára þetta með verðlaunum. Strákarnir eru að kveðja yngra landsliðið og hvað er betra en að ljúka síðasta mótinu með því að vinna leik og vinna til verðlauna á heimsmeistaramóti um leið. Við höfum skapað stórkostlegar minningar saman sem munu lifa með okkur um aldur og ævi,“ sagði Einar Andri sem hefur þjálfað þennan aldurshóp landsliðsmanna undanfarin ár ásamt Róberti Gunnarssyni, þeim þrautreynda landsliðsmanni.
Einnig er í þjálfaratreyminu Hlynur Morthens markvarðaþjálfari og síðan var Gunnar Magnússon íþróttastjóri HSÍ með í ferðinni á HM og Kári Árnason sjúkraþjálfari og Guðni Jónsson liðsstjóri.
Voru á okkur hlekkir
„Í dag var fæðingin erfið að þessum sigri, kannski ekki ósvipað og á móti Portúgal. Það var eins og á okkur væri hlekkir. Vörnin var ekki góð í fyrri hálfleik. Okkur tókst að fara vel yfir málin og finna karakterinn í hópnum sem ríkir og íslenska brjálæðið. Það skilaði þessu þegar á leið. Sigurinn stendur upp úr þegar allt er gert upp,“ sagði Einar Andri sem var hálf klökkur að leikslokum og lái honum hver sem vill.
