Víst er að covidveiran mun ekki gera íslenska landsliðinu í handknattleik gramt í geði næstu daga eftir að staðfest var í morgun, eftir PCR-próf í gær, að leikmenn og starfsmenn íslenska hópsins sem tekur senn stefnuna til Svíþjóðar fékk neikvæða niðurstöðu. Íslenska landsliðið fær þar með grænt ljós til þátttöku á heimsmeistaramótinu með fullmannað lið.
Skilyrði fyrir þátttöku á heimsmeistaramótinu er að skilað sé inn neikvæðri niðurstöðu úr PCR prófi við komuna á leikstað. Hefur gætt nokkurrar spennu síðustu daga vegna þessara skilyrða og fleiri atriða sem víkja að sóttvörnum á heimsmeistaramótinu.
Leikjadagskrá HM – smellið hér.
Næsta próf eftir riðlakeppnina
Þungu fari er létt af hópnum sem vonast til að halda sig réttu megin við línuna mótið til enda. Næst fara allir í covidpróf að lokinni riðlakeppni heimsmeistaramótsins á mánudagskvöldið áður stefnan verður tekin á næsta stig mótsins, hvort sem það verður keppnin um forsetabikarinn eða milliriðlakeppnin.
Eins og kom fram á handbolta.is í morgun heldur íslenski hópurinn til Svíþjóðar í kvöld frá Þýskalandi með viðkomu á Kastrupflugvelli í Kaupamannhöfn.
D-riðill (Kristianstad) 12. janúar: Ungverjaland – Suður Kórea, kl. 17. Ísland – Portúgal, kl. 19.30. 14. janúar: Portúgal – Suður Kórea, kl. 17. Ísland – Ungverjaland, kl. 19.30. 16. janúar: Suður Kórea – Ísland, kl. 17. Portúgal – Ungverjaland, kl. 19.30.
