„Ég væri til í að sjá stuðningssveit KA manna í húsinu við hlið okkar manna, og styðja okkur. KA-menn geta með því verið að tryggja algjöra veislu á næsta ári. Er eitthvað betra en bæjarslagur á næsta ári?,“ segir Kristinn Björgúlfsson í samtali við Akureyri.net í dag í aðdraganda annarrar viðureignar Þórs og Fjölnis í umspili um sæti í Olísdeild karla í handknattleik sem hefst í Íþróttahöllinni á Akureyri kl. 18.30. Fjölnir vann fyrsta leik liðanna síðasta laugardag eftir framlenginu, 30:26.
Hleypur undir bagga
Kristinn hefur hlaupið undir bagga með Halldóri Erni Tryggvasyni þjálfara Þórs upp á síðkastið og líkar vel. Hann segir stuðningsmenn Þórs hafa verið frábæra í síðustu leikjum og m.a. fylgt liðinu í oddaleik til Ísafjarðar á dögunum eins og kom fram á handbolti.is. Hann vill sjá allar hendur á dekk í höfuðstað Norðurlands.
Akureyringar verða að leggjast á árar með Þór í umspilinu að mati Kristins sem lengi þjálfaði og lék með ÍR. Hann segir skipta máli að bæði Akureyrarliðin verði í Olísdeildinni næsta vetur.
Sleppið litnum í dag
„Ég hvet alla þá sem ekki halda með Þór að sleppa litnum í dag, hugsa bara um veisluna sem þeir geta verið að búa til að ári,“ segir Kristinn ennfremur við Akureyri.net um leið og hann lofar að leikmenn Þórs leggi allt í sölurnar til að jafna metin á heimavelli í kvöld.
Eigum erindi
„Við viljum að sjálfsögðu meina að við eigum meira erindi en þeir [innsk.: Fjölnismenn] í efstu deild, en það er okkar að klára málið,“ segir Kristinn Björgúlfsson.
Sem fyrr segir hefst viðureign Þórs og Fjölnis í Íþróttahöllinni á Akureyri klukkan 18.30.
Sjá nánar á Akureyri.net – vef allra Akureyringa.
Sjá einnig:
Umspil Olís karla: leikjadagskrá og úrslit
