Ekkert verður af því í bili, hið minnsta, að íranski markvörðurinn Mohsen Babasafari Renani leiki með handknattleiksliði Harðar á Ísafirði í Olísdeldinni. Heimildir handbolta.is herma að Ranani hafi ekki fengið atvinnuleyfi hér á landi.
Ranani fékk leikheimild hjá HSÍ áður en félagaskiptaglugganum var lokað um síðustu mánaðamót. Þar sem um er að ræða leikmann utan hins evrópska efnahagssvæðis verður hann að hafa atvinnuleyfi hér á landi enda um atvinnumann í handknattleik að ræða.
Hörður er þegar með þrjá markverði á sínum snærum eftir því sem næst verður komist, Stefán Freyr Jónsson, Rolands Lebedevs og Emanuel Evangelista.
Rússinn brotnaði
Vonir standa til þess að Rússinn Alexander Tatarintsev geti leikið með Herði innan fárra vikna. Hann kom til félagsins í janúar en varð fyrir því óláni að handabrotna. Tatarintsev verður að öllum líkindum ekki klár í slaginn með Herði fyrr en eftir landsleikja- og bikarhlé sem gert verður á keppni í Olísdeildinni snemma í mars.
Staðan í Olísdeild karla og næstu leikir.
