Með því að ná sjöunda sæti á Evrópumóti 20 ára landsliða karla í handknattleik í Slóveníu í dag jafnaði íslenska landsliðið í þessum aldursflokki bestan árangur sinn. Ísland hefur einu sinni áður náð 7. sæti á EM í þessum aldursflokki. Það gerðist 2018. Þá voru keppnisþjóðir 16 en eru 24 nú eftir að fjölgað var um átta þátttökuþjóðir frá og með þessu móti.
Á EM 20 ára landsliða fyrir tveimur árum, sem fram fór í Portúgal hafnaði Ísland í 11. sæti. Uppistaða þess liðs gerði sér lítið fyrir og vann bronsverðlaun á HM fyrir ári sem haldið var í Grikklandi og Þýskalandi.
Ísland hafnaði í áttunda sæti á EM 2010 og í 11. sæti á EM 2012 í þessum aldursflokki.
Sjöunda sætið á EM að þessu sinni, auk þriðja sætis á HM 21 árs landsliða fyrir ári, vegur þungt þegar kemur að því að raðað verður í styrkleikaflokka áður en dregið verður í riðla heimsmeistaramóts 21 árs landsliða sem haldið verður í Póllandi frá 18. til 29. júní á næsta ári.
Með því að vera í efsta styrkleikaflokki þá kemst íslenska landsliðið hjá því að mæta allra bestu liðunum í riðlakeppni á fyrsta stigi mótsins. Alls taka 32 lið þátt í heimsmeistaramótinu. Þau verða dregin í átta riðla með fjórum liðum í hverjum.
Ísland hefur einu sinni orðið Evrópumeistari í yngri aldursflokkum í handknattleik í karlaflokki. Fyrir 21 ári varð 18 ára landsliðið Evrópumeistari.
Myndir: Ísland – Noregur, sjöunda sæti á EM í höfn
Björt framtíð í íslenskum handbolta
EMU20 karla: Leikir, úrslit og staðan, milliriðlar og sætisleikir
Enduðu EM á sigri – 7. sætið – Breki skellti í lás á afmælisdaginn
