Janus Daði Smárason var ekki búinn að vera lengi í keppnisbúningi Evrópumeistara SC Magdeburg þegar hann hitti fjölmennan hóp af ungum íslenskum handboltakrökkum sem eru við æfingar þessa vikuna í Magdeburg á vegum Handboltaskólans í Þýskalandi sem Árni Stefánsson hefur haldið úti um árabil af dugnaði og elju.
Janus Daði gekk til liðs við Evrópumeistarana í vikunni og mætti á sína fyrstu æfingu í morgun.
Eftir æfinguna heilsuðu íslensku landsliðsmennirnir Janus Daði, Gísli Þorgeir Kristjánsson og Ómar Ingi Magnússon upp á krakkana ásamt fleiri leikmönnum liðs Evrópumeistaranna. Eins og nærri má geta féll það í góðan jarðveg hjá krökkunum sem stóðust ekki mátið að fá myndir af sér með íslensku landsliðsmönnunum.
Hver veit nema að einhver þeirra sem nú eru í handboltaskólanum feti í fótspor þremenninganna í framtíðinni? Alltént eru ekki mörg ár liðin síðan Ómar Ingi var á meðal nemenda í Handboltaskólanum í Þýskalandi undir stjórn Árna Stefánssonar.
Margar myndir frá heimsókn krakkanna er að finna á Facebook-síðunni – Handboltaskólinn í Þýskalandi.
