- Auglýsing -
- Dagur Sverrir Kristjánsson skoraði tvö mörk og Ólafur Andrés Guðmundsson eitt þegar HF Karlskrona tapaði fyrir Hammarby, 38:28, í síðari viðureign liðanna í 16-liða úrslitum sænsku bikarkeppninnar í handknattleik í gær. Þorgils Jón Svölu Baldursson skoraði ekki mark. Phil Döhler er markvörður HF Karlskrona sem féll úr leik með tapinu þrátt fyrir sigur, 30:26, í fyrri viðureign liðanna í 16-liða úrslitum bikarkeppninnar.
- Lukas Jorgensen tryggði Flensburg annað stigið í heimsókn til Lemgo, 31:31, í síðasta leik fjórðu umferðar þýsku 1. deildarinnar í handknattleik karla í gærkvöldi. Jorgensen jafnaði metin sjö sekúndum fyrir leikslok. Leikið var á heimavelli Lemgo sem gert hefur það gott í upphafi deildarkeppninnar. Teitur Örn Einarsson átti eitt markskot fyrir Flensburg en tókst ekki að skora.
- Flensburg situr í sjötta sæti með fimm stig að loknum fjórum leikjum. Lemgo er í sætinu fyrir neðan með sama stigafjölda.
- Valsmenn léku með sorgarbönd í sigurleiknum við FH í Olísdeild karla í handknattleik í gær vegna andláts Einars Guðbergs Jónssonar lögreglufulltrúa sem lést 5. september. Einar Guðberg vann mikið sjálfboðaliðsstarf fyrir Val. Áður en leikurinn hófst var Einars Guðbergs minnst með mínútu þögn auk þess sem áhorfendur risu á fætur.
- Japanski markvörðurinn Shuhei Narayama sem samdi við karlalið Gróttu í sumar hefur loksins fengið samþykkt í gær félagaskipti ásamt atvinnuleyfi hér á landi. Narayama verður þar með gjaldgengur með Gróttu gegn HK í Hertzhöllinni á Seltjarnarnesi í 2. umferð Olísdeildar á föstudaginn.
- Orri Freyr Þorkelsson og félagar í Sporting sitja í efsta sæti portúgölsku 1. deildarinnar í handknattleik með tvö stig eftir fjóra leiki. Sporting vann ABC de Braga, 32:27, á sunnudagskvöldið í Braga. Orri Freyr skoraði ekki mark. Costa-bræðurnir voru að vanda frekir til fjörsins hjá Sporting. Þeir skoruðu samtals 21 af 32 mörkum liðsins.
- Auglýsing -
