- Auglýsing -
- Haukur Þrastarson og félagar í Industria Kielce mæta Orlen Wisłą Płock í úrslitaleik pólsku bikarkeppninnar í handknattleik á morgun eftir að bæði lið unnu undanúrslitaleikina í dag. Haukur skoraði eitt mark í þriggja marka sigri Indurstia Kielce á Wybrzeże Gdańsk, 33:30.
- Díana Dögg Magnúsdóttir meiddist á hné í gær og gat af þeirri ástæðu ekki leikið með BSV Sachsen Zwickau í dag þegar liðið steinlá fyrir Borussia Dortmund, 33:16, í 23. umferð þýsku 1. deildarinnar í handknattleik. BSV Sachsen Zwickau er í 10. sæti af 14 liðum deildarinnar þegar þrjár umferðir eru eftir.
- Díana Dögg sagði við handbolta.is í kvöld að vonir hennar standi til að meiðslin séu ekki alvarleg.
- Orri Freyr Þorkelsson skoraði sex mörk í sex skotum í 14 marka sigri Sporting Lissabon á ABC de Braga á heimavelli í dag, 37:23. Leikurinn var liður í úrslitakeppni efstu liða portúgölsku 1. deildarinnar um meistaratitilinn.
- Stiven Tobar Valencia var ekki með Benfica þegar liðið tapaði á heimavelli fyrir Porto, 34:29, í hinni viðureign fjögurra efstu liða portúgölsku 1. deildarinnar í gær. Stiven Tobar hefur verið frá keppni um tíma vegna meiðsla.
- Sporting stendur besta að vígi af liðunum fjórum í keppninni um meistaratitilinn, Sporting, Porto, Benfica og ABC de Braga.
- Grétar Ari Guðjónsson varði fimm skot, þar af eitt vítakast, þann tíma sem hann fékk til að láta ljós sitt skína í marki Sélestat þegar liðið vann Billère, 31:29, á útivelli í næst efstu deild franska handknattleiksins í dag. Sélestat er í fjórða sæti deildarinnar þegar þrjár umferðir eru eftir. Liðið er öruggt um sæti í umspili um sæti í efstu deild.
- Harpa Rut Jónsdóttir skoraði eitt mark þegar lið hennar, GC Amicitia Zürich, tapaði fyrsta undanúrslitaleiknum við Spono Eagles í úrslitakeppninni um svissneska meistaratitilinn í handknattleik kvenna í kvöld, 28:25. Næst mætast liðin í Zürich á miðvikudaginn.
- Auglýsing -
