„Staðan er vissulega góð en við eigum eftir að ná í síðasta sigurinn. Við verðum að vera í háskerpu til þess að ná í hann,“ sagði Dagur Arnarsson leikmaður ÍBV við handbolta.is í kvöld eftir að Dagur og samherjar unnu Hauka öðru sinni í úrslitaeinvíginu um Íslandsmeistaratitilinn í handknattleik á Ásvöllum í kvöld. Framundan er þriðja viðureignin í Vestmannaeyjum á föstudagskvöld þar sem ÍBV mun með sigri tryggja sér Íslandsmeistaratitilinn.
Líður best á sjó
„Mig langar ógeðslega mikið til þess að vinna Íslandsbikarinn einu sinni á heimavelli með okkar fólki. Ég hef unnið bikar á útivelli og siglt heim með Herjólfi. Það er skemmtilegt en það væri gaman einu sinni að taka við bikarnum heima í Eyjum. Til þess að svo verði þarf allt að ganga upp,“ sagði Dagur Arnarsson sem var þar með rokinn í sturtu áður en haldið verður til Eyja frá Þorlákshöfn í brælu í kvöld. Hann virtist ekki kvíða þriggja tíma siglingunni. „Okkur líður best á sjó,“ sagði Dagur og glotti við tönn.
