U17 ára landslið Íslands í handknattleik karla vann færeyska jafnaldra sína öðru sinni á jafnmörgum dögum í vináttuleik í Kaplakrika í dag, 34:28, eftir að hafa verið fimm mörkum yfir í hálfleik, 18:13. Tveimur mörkum munaði á liðunum gær, 26:24.
Leikirnir eru hluti af undirbúningi íslenska liðsins fyrir Opna Evrópumótið og Ólympíuhátíð Evrópuæskunnar sem fara fram í júlí.
Fjórar breytingar voru gerðar á íslenska hópnum fyrir leikinn í dag frá leiknum í gær. Um er að ræða fjölmennan hóp vaskra pilta sem munu áfram fá tækifæri í þeim verkefnum sem standa fyrir dyrum.
Íslensku piltarnir hófu leikinn af miklum krafti og skoruðu fjögur fyrstu mörkin áður en viðureignin jafnaðist aðeins. Íslenska liðið var þó áfram með nauma forystu allt þar til á síðustu mínútunum að liðið átti góðan sprett og var með fimm marka forskot í hálfleik, 18:13.
Leikmönnum færðist kapp í kinn í síðari hálfleik og harkan jókst. Munurinn breyttist lítt og var frá þremur og upp í fimm mörk allt þar til í blálokin að sex marka munur skildi liðin að, 34:28.
Mörk Íslands: Ágúst Guðmundsson 6, Dagur Árni Heimisson 5, Hugi Elmarsson 4, Magnús Dagur Jónatansson 4, Antoine Óskar Pantano 3, Aron Daði Stefánsson 2, Stefán Magni Hjartarson 2, Bernard Kristján Owusu Darkoh 2, Haukur Guðmundsson 2, Daníel Bæring Grétarsson 1, Jónas Karl Gunnlaugsson 1, Jökull Helgi Einarsson 1, Max Emil Stenlund 1.
Sigurjón Bragi Atlason varði 8 skot og Óskar Þórarinsson varði 5 skot.
