- Auglýsing -
- Í dag eru 99 dagar þangað til Evrópumót karla í handknattleik hefst í Þýskalandi. Haft var eftir Andreas Michelmann forseta þýska handknattleikssambandsins í fjölmiðlum í gær að um 250 þúsund miðar á leiki mótsins væru seldir af um 400 þúsund sem í boði eru. Þar af er reiknað með a.m.k. 3.000 Íslendingum til München og öðrum eins fjölda Færeyinga til Berlínar. Einnig munu Króatar koma í þúsundatali til Mannheim.
- Rúmenska liðið H.C. Dunarea Braila sem lagði Val í 1. umferð undankeppni Evrópudeildar kvenna í handknattleik mætir Borussia Dortmund í síðari umferð undankeppninnar sem fram fer eftir miðjan nóvember. Með Dortmund leikur sænska handknattleikskonan Emma Olsson sem varð Íslandsmeistari með Fram vorið 2022.
- Storhamar, sem Akureyringurinn og fyrrverandi landsliðsþjálfari kvenna, Axel Stefánsson þjálfar, mætir einnig til leiks í aðra umferð undankeppni Evrópudeildarinnar. Storhamar mætir sænska liðinu H65 Höörs HK heima og að heiman 11 . og 19. nóvember.
- Enska handknattleikssambandið hefur verið sektað af Handknattleikssambandi Evrópu, EHF, um 10.000 evrur fyrir að draga kvennalandslið sitt úr leik í forkeppni Evrópumóts kvenna í handknattleik. Enska landsliðið var skráð til leiks en eftir að dregið hafði verið í undankeppnina snerist forráðamönnum enska handknattleikssambandsins hugur. Slík framkoma er óboðleg að mati stjórnenda EHF.
- Auglýsing -
