- Auglýsing -
- Ribe-Esbjerg, sem Ágúst Elí Björgvinsson og Elvar Ásgeirsson leika með krækti í annan vinning sinn í úrslitakeppni efstu liða dönsku úrvalsdeildarinnar í gær. Ribe-Esbjerg vann Bjerringbro/Silkeborg, 37:33, á heimavelli í riðli eitt í átta liða úrslitum úrslitakeppninnar. Annað fyrirkomulagt er á úrslitakeppni átta efstu liða í Danmörku en hér á landi. Í ríki Friðriks kongungs tíunda er liðunum skipt niður í tvo riðla með fjórum liðum í hvorum.
- Elvar Ásgeirsson skoraði fjögur mörk í sigurleiknum í gær. Hann átti einnig þrjár stoðsendingar. Ágúst Elí Björgvinsson varði 4 skot, 28,5%, á þeim tíma sem hann stóð í marki Ribe–Esbjerg. Einnig skoraði Ágúst Elí eitt mark.
- Ribe-Esbjerg situr í þriðja sæti riðils eitt í úrslitakeppninni með fjögur stig eins og Mors-Thy þegar fjórum umferðum af sex er lokið. Ribe-Esbjerg á þar með möguleika á sæti í undanúrslitum takist vel upp í næstu tveimur viðureignum. Aalborg Håndbold er lang efst með 10 stig.
- Óðinn Þór Ríkharðsson skoraði níu mörk í þriggja marka sigri Kadetten Schaffhausen, 25:22, á Pfadi Winterthur í þriðju viðureign liðanna í undanúrslitum svissnesku A-deildarinnar í handknattleik karla í gær. Leikurinn fór fram á í Schaffhausen. Kadetten hefur tvo vinninga en Winterthur einn. Næsta viðureign fer fram á miðvikudagskvöld í Winterthur.
- HC Kriens hefur tvo vinninga í hinni rimmu undanúrslitanna í Sviss gegn einum liðs GC Zürich.
- Síðasta umferð norsku úrvalsdeildarinnar í handknattleik kvenna fór fram í gær. Axel Stefánsson og leikmenn hans hjá Storhamar unnu Tertnes, 29:27, á heimavelli og höfnuðu í 2. sæti með 46 stig i 26 leikjum, átta stigum á undan Sola en 10 stig á eftir Vipers. Storhamar hefur setið í öðru sæti allt tímabilið, næst á eftir Vipers Kristiansand sem varð norskur meistari sjöunda árið í röð. Liðið vann alla leiki tímabilsins.
- Fredrikstad Bkl. tapaði fyrir Aker á heimavelli í gær, 34:21. Elías Már Halldórsson þjálfar Fredrikstad Bkl og hefur gert síðustu þrjú ár. Fredrikstad Bkl varð í fimmta sæti með 31 stig. Aker féll í 1. deild.
- Auglýsing -
