- Auglýsing -
- Ágúst Þór Jóhannsson þjálfari Íslandsmeistara Vals verður ekki við stjórnvölin á laugardaginn þegar Íslandsmeistararnir taka þá móti Fram í 1. umferð Olísdeildar kvenna í handknattleik. Ágúst Þór „fór undir gaffalinn“ eins og hann segir sjálfur, þar sem lagfærður var liðþófi í hné og einnig átt við brjóskskemmdir. Ágúst Þór var afar liðtækur handknattleiksmaður áður en hann sneri sér að þjálfun og sýpur nú seyðið af leikmannaferlinum.
- Handknattleiksmaðurinn Kristján Orri Jóhannsson segist ekki hafa á prjónunum að taka fram skóna á leiktíðinni. Hann hefur í mörg horn að líta í fagi sínu við ljósmyndum hvar hann hefur náð góðum árangri enda snjall og útsjónarsamur.
- Kristján Orri hefur þrjú síðustu tímabil verið í því liði sem unnið hefur sig upp í Olísdeildina í gegn umspil. Vorið 2021 var Kristján Orri leikmaður Kríu, árið eftir með ÍR og í vor lék Kristján Orri með Víkingi sem vann Fjölni naumlega í oddaleik um sæti í Olísdeild.
- Oddur Gretarsson skoraði þrjú mörk, öll úr vítaköstum, og Daníel Þór Ingason skoraði eitt mark þegar lið þeirra Balingen-Weilstetten vann Stuttgart, 29:28, í viðureign liðanna í suður-Þýskalandi í gær. Leikurinn fór fram í Sparkassen Arena, heimavelli Balingen, og markaði upphaf þriðju umferðar þýsku 1. deildarinnar. Balingen-Weilstetten hefur fjögur stig eftir þrjá leiki.
- Anna Mary Jónsdóttir sem leikið hefur með KA/Þór og var m.a. í Íslandsmeistaraliðinu vorið 2021 hefur fengið félagaskipti til Danmerkur eftir því sem fram kemur á félagaskiptasíðu HSÍ.
- Færeyingurinn Jonn Rói Tórfinnsson og leikmaður Þórs á Akureyri á síðustu leiktíð verður ekki í herbúðum liðsins í vetur. Jonn Rói er kominn til Danmerkur eftir því sem kemur fram á félagaskiptasíðu HSÍ.
- Auglýsing -
