- Auglýsing -
- Aldís Ásta Heimisdóttir og Jóhanna Margrét Sigurðardóttir, landsliðskonur í handknattleik, fá nýjan þjálfara til Skara-liðsins á næstu leiktíð. Pether Krautmeyer hefur verið ráðinn þjálfari liðsins frá og með næstu leiktíð. Magnus Frisk sem þjálfað hefur sænska úrvalsdeildarliðið um árabil hverfur til annarra starfa. Krautmeyer hefur um árabil þjálfað kvennalið Holstebro í Danmörku.
- Andrea Jacobsen landsliðskona í handknattleik er ennþá frá keppni vegna höfuðmeiðsla og tók þar af leiðandi ekki þátt í leik með Silkeborg-Voel þegar liðið sótti Danmerkurmeistara Esbjerg heim í gær í 25. og næst síðustu umferð úrvalsdeildarinnar. Esbjerg vann örugglega, 39:22, og innsiglaði þar með deildarmeistaratitilinn. Liðið er með fullt hús stiga eftir 25 leiki. Silkeborg-Voel er í sjötta sæti.
- Storhamar vann sannfærandi sigur á Gjerpen, 32:23, í 23. umferð norsku úrvalsdeildarinnar í handknattleik á heimavelli í gær. Axel Stefánsson er og verður annar þjálfari Storhamar út leiktíðina þegar hann lætur af störfum. Storhamar er í öðru sæti deildarinnar með 40 stig að loknum 23 leikjum. Vipers er taplaust og efst með 44 stig eftir 22 leiki. Vipers vann Oppsal, 35:30 í gær.
- Harpa Rut Jónsdóttir skoraði þrjú mörk fyrir GC Amicitia Zürich þegar liðið vann LK Zug, 28:25, í svissnesku A-deild kvenna í handknattleik í gær. Harpa lék um nokkurt skeið með LK Zug áður en hún gekk til liðs við Zürich-liðið fyrir tveimur árum. Í sex liða keppni liðanna í efri hluta deildarinnar eru Harpa Rut og samherjar í þriðja sæti. LK Zug rekur lest liðanna sex.
- Auglýsing -
