- Auglýsing -
- Aldís Ásta Heimisdóttir skoraði fimm mörk og átti fimm stoðsendingar fyrir Skara HF þegar liðið gerði jafntefli við HK Aranäs, 30:30, á heimavelli í sænsku úrvalsdeildinni í handknattleik í gærkvöld. Jóhanna Margrét Sigurðardóttir skoraði ekki mark fyrir Skara en gaf fjórar stoðsendingar. Katrín Tinna Jensdóttir var ekki í leikmannahópi Skara sem er í 9. sæti með sjö stig eftir 10 leiki. Skövde er í áttunda sæti með 10 stig.
- Óðinn Þór Ríkharðsson skoraði níu mörk, fimm úr vítaköstum þegar Kadetten Schaffhausen vann BSV Bern, 33:21, á heimavelli í A-deild karla í handknattleik í Sviss í gærkvöld. Óðinn Þór var markahæstur á leikvellinum. Kadetten er efst í deildinni eins og áður. Liðið er með 33 stig eftir 19 leiki.
- Kristján Örn Kristjánsson, Donni, var ekki í leikmannahópi PAUC í gærkvöld þegar liðið vann Cesson Rennes, 34:32, í 15. umferð frönsku 1. deildarinnar. PAUC er í sjöunda sæti deildarinnar með 16 stig eftir 15 leiki. Donni á í meiðslum á öxl eins og kom síðasta fram á handbolti.is í gær.
- Ivry, sem Darri Aronsson er samningsbundinn, tapaði á heimavelli fyrir Dunkerque, 34:27, í frönsku 1. deildinni í gær. Ivry er í 12. sæti af 16 liðum deildarinnar. Darri er óðum að jafna sig af meiðslum og getur vonandi leikið með Ivry fljótlega á nýju ári.
- Grétar Ari Guðjónsson, markvörður, og samherjar hans í Sélestat unnu afar mikilvægan sigur á Tremblay, toppliði næst efstu deildar franska handknattleiksins í gær, 29:27. Grétar Ari stóð í marki Sélestat allan leikinn og varði 11 skot, 29%, auk þess að eiga eina stoðsendingu. Leikurinn fór fram á heimavelli Tremblay.
- Sélestat er í þriðja sæti deildarinnar með 20 stig eftir 14 leiki. Tremblay er efst með 26 stig en tapið á heimavelli í gær var það fyrsta í 14 leikjum. Pontault er í öðru sæti með 21 stig.
- Bjarki Finnbogason skoraði þrjú mörk fyrir Anderstorps SK þegar liðið tapaði fyrir IFK Karlskrona, 28:22, í næst efstu deild, Allsvenskan, í sænska handknattleiksins í gærkvöld. Anderstorps SK situr í 11. sæti af 14 liðum deildarinnar 12 stig að loknum 15 leikjum.
- Auglýsing -
