- Auglýsing -
- Skara HF færðist upp í fimmta sæti sænsku úrvalsdeildarinnar í handknattleik kvenna í gærkvöld með stórsigri á IF Hallby HK, 34:24, á heimavelli. Aldís Ásta Heimisdóttir skoraði fimm mörk og átti þrjár stoðsendingar og Jóhanna Margrét Sigurðardóttir skoraði tvö mörk og gaf einnig þrjár stoðsendingar en báðar leika þær með Skara HF sem hefur ekki tapað leik síðan snemma í nóvember. Á þeim tíma hefur liðið færst úr níunda sæti og upp í það fimmta.
- Teitur Örn Einarsson skoraði þrjú mörk þegar Flensburg tapað með eins marks mun fyrir Füchse Berlin, 32:31, í hörkuleik í þýsku 1. deildinni í handknattleik í gær. Leikurinn fór fram í Berlín. Flensburg skoraði tvö síðustu mörk leiksins. Füchse Berlin jafnaði þar með SC Magdeburg í efsta sæti deildarinnar. Hvort lið hefur 34 stig eftir 19 umferðir. Flensburg situr í þriðja sæti sex stigum á eftir.
- Serbneski landsliðsmarkvörðurinn Dejan Milosavljev átti stórleik í marki Füchse Berlin og í raun má segja að frammistaða hans hafi skilið liðin að. Milosavljev varði 15 skot, þar af eitt vítakast.
- Holstebro tapaði fyrir Skjern í grannaslag í dönsku úrvalsdeildinni í handknattleik í gær, 26:22. Arnór Atlason er þjálfari Holstebro sem situr í 10. sæti af 14 liðum deildarinnar þegar 20 af 26 umferðum er lokið.
- Enn er því miður óvíst hvenær hollenski handknattleiksmaðurinn Kay Smits snýr aftur inn á leikvöllinn með þýska liðinu Flensburg. Smits greindist með hjartsláttartruflanir í desember tók sér þá hlé frá keppni og hætti einnig við að leika með hollenska landsliðinu á Evrópumótinu.
- Sport Bild í Þýskalandi hefur eftir Ljubomir Vranjes íþróttastjóra Flensburg að Smits fari aftur í rannsókn í lok þessa mánaðar og þangað til sé hið minnsta kosti ljóst að hann leikur ekki með liði félagsins. Smits kom til Flensburg á síðasta sumri eftir að hafa orðið Evrópumeistari með SC Magdeburg. Hann þykir ein allra besta örvhenta skyttan í þýskum handknattleik um þessar mundir.
- Auglýsing -
