- Auglýsing -
- Skara HF féll úr leik eftir tap fyrir Sävehof, 30:22, í oddaleik í undanúrslitum sænsku úrvalsdeildarinnar í gær. Leikið var í Partille. Aldís Ásta Heimisdóttir skoraði eitt mark en Jóhanna Margrét Sigurðardóttir komst ekki á blað. Hún var að leika í síðasta sinn með Skara. Jóhanna Margrét gengur til liðs við IFK Kristianstad fyrir næsta keppnistímabil.
- Sävehof leikur til úrslita við Önnereds um sænska meistaratitilinn. Önnereds vann Skuru óvænt í undanúrslitum, 3:1, í vinningum talið.
- Ýmir Örn Gíslason og félagar í Rhein-Neckar Löwen unnu THW Kiel í gær, 30:26, í þýsku 1. deildinnni í handknattleik en leikið var á heimavelli Kiel. Ýmir Örn skoraði ekki mark í leiknum. Honum var einu sinni vikið af leikvelli. Svíinn Eric Johansson skoraði 12 mörk fyrir Kiel en David Móré var markahæstur hjá Löwen með sex mörk.
- Rhein-Neckar Löwen er í 10. sæti þýsku 1. deildarinnar með 26 stig þegar liðið á þrjá leiki eftir. Kiel er í fjórða sæti með 42 stig og á fjórum viðureignum eftir ólokið.
- Miłosz Wałach annar tveggja markvarða Industria Kielce hefur framlengt samning sinn við félagið til tveggja ára með klásúlu um að hægt verði að framlenga samninginn um ár til viðbótar verði áhugi fyrir hendi. Þrálátur orðrómur hefur verið síðustu vikur að kollegi Wałach Andreas Wolff söðli um og gangi fyrr en síðar til liðs við SC Magdeburg.
- Nýliðar þýsku 1. deildarinnar í handknattleik á næsta keppnistímabili, VfL Potsdam, hafa samið við Martin Tomovski markvörð RK Vardar Skopje til eins árs. Tomovski kemur til Potsdam í sumar. Tomovski þekkir til í þýska handboltanum vegna þess að hann var með Eulen Ludwigshafen frá 2019 til 2021.
- Aaron Ziercke sem tók við þjálfun þýska handknattleiksliðinu GWD Minden í janúar þegar Aðalsteinn Eyjólfsson var látinn taka pokann sinn verður áfram þjálfari liðsins á næstu leiktíð. Minden var í fallhættu þegar Ziercke tók við en er nú úr allri hætti þótt það sé enn á meðal neðstu liða.
- Auglýsing -
