- Auglýsing -
- Valsmaðurinn Allan Norðberg var markahæstur í færeyska landsliðinu í gær ásamt Elias Ellefsen á Skipagøtu þegar færeyska landsliðið vann japanska landsliðið í vináttuleik í Japan, 30:29. Allan og Elias skoruðu sjö mörk hvor. Hinn hornamaður færeyska landsliðsins, Hákun West av Teigum, er ekki með landsliðinu í Japansferðinni og því mæðir meira á Allan.
- Fyrrverandi leikmaður Fram, Vilhelm Poulsen, skoraði þrjú mörk og Bjarni í Selvindi, tilvonandi samherji Allans hjá Val, skoraði einu sinni.
- Færeyska landsliðinu var boðið til Japans til tveggja vináttuleikja sem er hluti af undirbúningi japanska landsliðsins fyrir þátttöku í handknattleikskeppni Ólympíuleikanna sem hefjast síðar í þessum mánuði. Síðari viðureign Japans og Færeyja verður á morgun.
- Carlos Ortega þjálfari Evrópumeistara Barcelona stýrir undirbúningi og þjálfun japanska landsliðsins fyrir Ólympíuleikana en hann tók það verkefni að sér eftir að Dagur Sigurðsson sagði starfi sínu lausu í febrúar og tók við þjálfun króatíska landsliðsins.
- Franski handknattleiksmaðurinn, Nikola Karabatic sem talin er einn sá allra besti í íþróttinni í sögunni, segist ekki hafa nokkurn áhuga á að gerast þjálfari eða framkvæmdstjóri handknattleiksfélags eftir að ferlinum lýkur að loknum Ólympíuleikunum. Karabatic segist ætla að einbeita sér að því að leggja sprotafyrirtækjum lið, einkum á sviði íþróttta. Þá vilji hann hlúa vel að handboltaskóla sem hann hefur haldið út um skeið með bróður sínum Luka.
- Dragan Adžić hefur framlengt starfssamning sinn við slóvenska handknattleikssambandið um þjálfun kvennalandsliðsins fram til árins 2027. Adžić tók við þjálfun landsliðsins í apríl 2021. Adžić er Svartfellingur og stýrði landsliði heimalandsins frá 2010 til 2017 og Budućnost frá 2010 til 2020. Undanfarin tvö ár hefur Adžić þjálfað Krim Ljubljana, slóvenska meistaraliðið samhliða þjálfun landsliðsins.
- Auglýsing -
